"Save me a seat on your side, Sam..." want dit is die beste plek om te wees, die veiligste, die sekerste. Ek het gedink ek kan beter doen as jy. Ek het gedink ek is beter. Ek het dinge gedoen vir eie gewin. Ek wou so graag hê wat ander het, en wou dit net vat, weg vat van ander... vir myself.

Maar hier hang jy langs my aan die kruis en my oë het oop gegaan. Jy onskuldig en ek skuldig.

Dink tog aan my wanneer jy in die paradys is... "Save me a seat on your side,Sam..", is die woorde wat 'n vrou in hierdie rolprent gespreek het. 'n Mens soos ek en miskien soos jy. En die bogenoemde is die gedagtes wat hierdie sewe woorde by my losgemaak het, wat in my opgekruip het en warm hier styf binne my kom lê het, en wat 'n spontane "Vergewe my Here" saggies oor my nat gehuilde lippe laat prewel het.

Vir my sou hierdie fantastiese rolprent nie afgesluit en die hoofstuk in die Groot Verhaal nie volmaak gewees het, sonder hierdie woorde nie.

I am Sam, is 'n verhaal wat ons leer, dat hoe perfek ons ook al mag wees, dat daar tye in ouerskap kom, wat ons "retarded", "disabled" laat. 'n Verhaal van hoop, van oorgee, van aanhou en van ophou, van geloof, maar bo alles, van liefde.

Maar kyk gerus self na hierdie rolprent want daar is soveel skitterende diamante daarin dat jy dalk 'n ander een sal vind wat aan jou hand sal pas.